Viggó Kristjánsson, landsliðsmaður í handbolta, og samherjar hans í þýska liðinu Leipzig unnu sinn fimmta sigur í röð í þýsku 1. deildinni er liðið vann stórlið Flensburg á heimavelli, 31:30, á sunnudag.
Liðið vann aðeins einn af fyrstu tíu leikjum sínum í deildinni og var André Haber því vikið frá störfum. Rúnar Sigtryggsson var ráðinn í hans stað og hefur Leipzig unnið alla fimm leiki sína undir stjórn Rúnars.
„Þetta var orðið helvíti þungt. Með hverjum sigri verður léttara á mönnum og þeir hafa meiri trú á sér og liðinu. Klefinn er allt annar og þetta er miklu skemmtilegra,“ sagði Viggó í samtali við Morgunblaðið. Hann skoraði sigurmark Leipzig gegn Flensburg á síðustu sekúndunum.
Viðtalið má sjá í heild sinni á íþróttasíðum Morgunblaðsins sem kom út í morgun.