Nokkrir Íslendingar voru í eldlínunni í kvöld þegar 5. umferð Evrópudeildarinnar í handknattleik karla fór fram. Landsliðsmennirnir Teitur Örn Einarsson og Óðinn Þór Ríkharðsson voru þar á meðal í sigurliðum.
Teitur Örn skoraði eitt mark í 38:32-sigri Flensburg á Benidorm í B-riðli, riðli Vals.
Flensburg er þar með áfram á toppi riðilsins með átta stig. Aix og Ystad koma þar á eftir með sex stig og Valur er í fjórða sæti með fimm stig.
Kadetten Schaffhausen gerði þá frábæra ferð til Þýskalands og lagði Göppingen að velli með minnsta mun, 25:24, í A-riðlinum.
Óðinn Þór skoraði þrjú mörk fyrir Kadetten, sem Aðalsteinn Eyjólfsson þjálfar.
Liðið er eftir sigurinn með átta stig í öðru sæti A-riðils.
Austurríska liðið Alpla Hard, sem Hannes Jón Jónsson þjálfar, krækti í sitt fyrsta stig í C-riðli þegar það gerði 30:30-jafntefli við Balatonfüredi, sem vann sér sömuleiðis inn sitt fyrsta stig í riðlinum.
Í sama riðli tapaði Skjern, sem Sveinn Jóhannsson leikur með, 28:30 fyrir Sporting frá Lissabon.
Sveinn komst ekki á blað hjá Skjern að þessu sinni.
Liðið er í þriðja sæti C-riðils með sex stig, en Granollers í öðru sæti og Sporting í fjórða eru einnig með sex stig.