Íþróttir | Handbolti | mbl | 12.3.2023 | 17:35 | Uppfært 13.3.2023 12:49

Svöruðu tapinu í Tékklandi með stórsigri

Mynd 1 af 9 Viktor Gísli Hallgrímsson fagnar vel í Laugardalshöll í dag. Viktor var frábær í marki íslenska liðsins. Hann varði 13 skot og var með yfir 50% markvörslu. mbl.is/Óttar

Mynd 2 af 9 Stiven Tobar Valencia lék í um það bil 30 mínútur í dag og skoraði tvö mörk. Þetta var fyrsti heimaleikur hans með íslenska landsliðinu. mbl.is/Óttar

Mynd 3 af 9 Gísli Þorgeir Kristjánsson var öflugur í íslenska liðinu, stýrði sóknarleiknum vel og skoraði grimmt. mbl.is/Óttar

Mynd 4 af 9 Aron Pálmarsson fékk aukakast þegar leiktíminn var liðinn í fyrri hálfleik en kom boltanum ekki fram hjá varnarvegg Tékka. mbl.is/Óttar

Mynd 5 af 9 Það var góð stemning í Laugardalshöll að venju. mbl.is/Óttar

Mynd 6 af 9 Viktor Gísli Hallgrímsson kom inn á um miðbik fyrri hálfleiks og skellti íslenska markinu í lás fyrstu mínúturnar. mbl.is/Óttar

Mynd 7 af 9 Bjarki Már Elísson skoraði fjögur mörk í dag. mbl.is/Óttar

Mynd 8 af 9 Landsliðsfyririliðinn Aron Pálmarsson í baráttunni. mbl.is/Óttar Geirsson

Mynd 9 af 9 Gísli Þorgeir Kristjánsson sækir að marki Tékka. Gísli var markahæstur íslensku strákanna ásamt Viggó Kristjánssyni en þeir skoruðu sex mörk hvor. mbl.is/Óttar Geirsson

Íslenska karlalandsliðið í handknattleik endurheimti toppsæti 3. riðils undankeppni EM 2024 með stórsigri gegn Tékklandi í Laugardalshöll í dag.

Leiknum lauk með níu marka sigri Íslands, 28:19, en Gísli Þorgeir Kristjánsson og Viggó Kristjánsson voru markahæstir í íslenska liðinu með sex mörk hvor.

Viggó Kristjánsson skoraði fyrsta mark leiksins en Tékkar skoruðu næstu tvö og komust í 2:1.

Liðin skiptust á að skora og Elvar Örn Jónsson kom Íslandi tveimur mörkum yfir, 5:3. Tékkum tókst að jafna metin og var mikið jafnræði með liðunum á fyrstu mínútunum.

Aron Pálmarsson kom íslenska liðinu aftur tveimur mörkum yfir, 10:8, þegar tíu mínútur voru eftir af fyrri hálfleik og Arnar Freyr Arnarsson kom Íslandi í 11:8 stuttu síðar eftir frábæra innkomu markvarðarins Viktors Gísla Hallgrímssonar sem lokaði markinu.

Arnar Freyr kom Íslandi svo fjórum mörkum yfir í fyrsta sinn í leiknum þegar mínúta var eftir af hálfleiknum, 15:11, en Matej Klíma náði að laga stöðuna undir lok fyrri hálfleiks og staðan í hálfleik var því 15:12, Íslandi í vil.

Mikið jafnræði var með liðunum í upphafi síðari hálfleiks en Steven Tobar Valencia kom Íslandi sex mörkum yfir í fyrsta sinn í leiknum á 42. mínútu með sínu fyrsta landsliðsmarki, 20:14.

Óðinn Þór Ríkharðsson kom Íslandi sjö mörkum yfir, 22:15, þegar fimmtán mínútur voru eftir af leiknum af vítalínunni og Gísli Þorgeir kom Íslandi átta mörkum yfir, 23:15 þegar tíu mínútur voru til leiksloka.

Tékkum tókst hins vegar að minnka forskot íslenska liðsins í fimm mörk þegar átta mínútur voru eftir með marki af vítalínunni, 23:18.

Þá kom frábær leikkafli hjá íslenska liðinu þar sem Viktor Gísli lokaði markinu og sóknarleikurinn gekk frábærlega. Viggó Kristjánsson kom Íslandi átta mörkum yfir, 27:19, þegar tvær mínútur voru til leiksloka og Óðinn Þór Ríkharðsson innsiglaði níu marka sigur liðsins á lokamínútu leiksins.

Viktor Gísli Hallgrímsson átti stórleik í marki Íslands, varði 13 skot, þar af eitt vítakast, og var með rúmlega 50% markvörslu.

Ísland er með sex stig í efsta sæti riðilsins, líkt og Tékkland, en Ísland er með betri innbyrðisviðureign á Tékka. Eistland er með tvö stig og Ísrael er án stiga.

Ísland mætir Eistlandi og Ísrael í lokaleikjum undankeppninnar í apríl og með sigri í báðum leikjum tryggir liðið sér efsta sæti riðilsins og þar með sæti í efsta styrkleikaflokki þegar dregið verður í riðla fyrir EM 2024 sem fram fer í Þýskalandi.