Viktor sá fjórði hjá Barcelona

Þegar landsliðsmarkvörðurinn Viktor Gísli Hallgrímsson klæðist markmannstreyju Barcelona verður hann fjórði Íslendingurinn sem spilar fyrir stórliðið í Katalóníu í íþróttinni. 

Frétt af mbl.is

Viktor Gísli samdi við Barcelona

Viggó Sigurðsson ruddi brautina árið 1978 eftir góða spilamennsku með Víkingi og lék með Barcelona 1978 til 1980. 

Viggó Sigurðsson er í seinni tíð þekktari fyrir þjálfaraferilinn en leikmannaferilinn. mbl.is/Þorkell Þorkelsson

Gróttumaðurinn Guðjón Valur Sigurðsson lék með Barcelona árin 2014 til 2016. 

FH-ingurinn Aron Pálmarsson lék með Barcelona árin 2017 til 2021. 

Það þóttu mikil tíðindi á sínum tíma þegar Barcelona tókst að næla í Aron Pálmarsson frá öðru stórliði: Veszprém í Ungverjalandi. Ljósmynd/Barcelona

Framarinn Viktor Gísli er því í góðum félagsskap en Barcelona hefur verið stórlið í handboltanum í áratugi og raunar í þremur boltagreinum. Viggó, Guðjón Valur og Aron urðu allir spænskir meistarar með liðinu og Guðjón Valur var jafnframt í sigurliði Barcelona í Meistaradeild Evrópu. 

Eiður varð Evrópumeistari

Þegar allt er talið verður Viktor Gísli sjötti Íslendingurinn sem semur við Barcelona. 

ÍR-ingurinn Eiður Smári Guðjohnsen lék með knattspyrnuliði Barcelona 2006 til 2009 og var í liðinu sem sigraði í Meistaradeildinni árið 2009 eins og frægt varð. 

Eiður Smári Guðjohnsen lék með heimsþekktum leikmönnum eins og Ronaldinho hjá Barcelona. AFP

Haukamaðurinn Kári Jónsson var um tíma hjá Barcelona en lék ekki með aðalliði félagsins í körfuknattleik. Kári var einungis 21 árs þegar hann samdi við félagið en hinir Íslendingarnir fimm voru allir orðnir þekkt nöfn í bransanum þegar þeir fóru til Katalóníu. 

Kári Jónsson er einn þeirra sem komu Íslandi í lokakeppni EM í körfunni sem fram fer síðsumars. mbl.is/Eggert Jóhannesson

• Blogga um frétt