Íþróttir | Handbolti | mbl | 17.5.2025 | 21:20

Næstbesti dagur lífs míns

Þórey Anna er Evrópubikarmeistari með Val. mbl.is/Hákon

„Ég veit ekki hvernig mér líður núna,“ sagði Þórey Anna Ásgeirsdóttir leikmaður Vals í samtali við mbl.is eftir að hún varð Evrópubikarmeistari með liðinu með sigri á Porrino frá Spáni á Hlíðarenda í dag.

Frétt af mbl.is

Valur Evrópubikarmeistari eftir háspennu

„Maður er enn að meðtaka þetta en samt er maður ótrúlega glaður og þreyttur. Ég er ótrúlega ánægð með þetta,“ sagði Þórey.

Hún hélt á boltanum í heilar fimm sekúndur að reyna að taka innkast þegar leiktíminn rann út og eins marks sigur Vals varð staðreynd.

„Jesús minn! Ég horfði á klukkuna og sá fimm sekúndur eftir. Ég hugsaði að ég gæti ekki hangið á boltanum í fimm sekúndur. En svo endaði þetta þannig,“ sagði hún kát.

Valur var með sjö marka forskot þegar skammt var eftir og hélt svo út þegar spænska liðið náði góðu áhlaupi í lokin.

„Þetta voru svakalega langar lokamínútur. Ég var farin að líta á klukkuna þegar það voru sjö mínútur búnar af seinni hálfleik. Ég var í þvílíku basli með sjálfa mig að reyna að einbeita mér að einni sókn í einu.

Einhvern veginn leitaði hugurinn alltaf aðeins lengra. Það getur orðið svolítið dauður tími þegar maður er í horninu,“ sagði Þórey, sem skilaði sínu mjög vel í dag og var markahæst með sex mörk.

„Þegar maður er í action þá er ekki mikið að hugsa um. Maður er líka með góða reynslu af vítalínunni og það er gaman að fara á hana.“

Hlíðarendi var troðfullur í dag og var Þórey þakklát fyrir stuðninginn.

„Þetta er ólýsanlegt og ég er ótrúlega þakklát fyrir að svona margir mættu. Það var þvílík mæting og þvílík umgjörð. Valur á stórt hrós skilið fyrir geggjaða umgjörð. Það var allt upp á tíu.“

Dagurinn í dag er næstbesti dagurinn í lífi Þóreyjar, enda ekki hægt að toppa fæðingu frumburðarins.

„Þetta er næsbesti dagur lífsins á eftir fæðinguna á syni mínum. Þetta er stærsti handboltaleikur sem ég hef spilað og þetta gefur manni mikið,“ sagði Þórey.