„Þá fór hausinn og sjálfstraustið“

„Við þurfum að fara yfir þetta og sjá hvort við getum breytt einhverju en staðan er slæm, það er ljóst,“ sagði Stefán Arnarson þjálfari Hauka en liðið er 2:0-undir í einvíginu um Íslandsmeistaratitil kvenna í handbolta eftir 29:22-tap á heimavelli gegn Val í kvöld.

Frétt af mbl.is

Valur einum sigri frá titlinum

„Fyrri hálfleikurinn var virkilega góður. Við spiluðum góðan sóknaleik og varnarleikurinn var til fyrirmyndar en við byrjum seinni hálfleik á að fara 6:1 undir og því miður eftir það var ekki aftur snúið,“ sagði Stefán en Haukar voru 13:12 yfir í hálfleik.

Seinni hálfleikur byrjaði hræðilega og liðið skoraði aðeins fimm mörk á 27 mínútum í seinni.

„Við byrjuðum að klikka á færum og þá fór hausinn og sjálfstraustið. Síðan var sóknarleikurinn erfiður og Valur spilaði frábæra vörn en slæmt hvað það er mikill munur á hálfleikjum hjá okkur.

Eftir að við byrjum að klikka þá erum við svo lítil í okkur og þú mátt aldrei láta sóknarleikinn taka vörnina. Við hættum líka að spila vörn og þá bara tapar þú fyrir Val í úrslitum, það er ekki flókið.“

Það er nóg sem liðið þarf að hugsa um fyrir næsta leik sem er sá síðasti í einvíginu ef liðið tapar. Liðið hefur sigrað Val áður en virtist hafa litla trú á verkefninu í kvöld.

„Fyrri hálfleikur var góður en við missum trúna í seinni hálfleik þegar við byrjum að klikka og við þurfum að laga það að það geta allir gert mistök í íþróttum en það er næsti bolti sem skiptir máli.“

• Blogga um frétt