Skoraði 17 mörk í jafntefli gegn Færeyjum

Íslenska U21 landsliðið í handbolta gerði jafntefli við Færeyjar, 35:35, í F-riðli á U21 heimsmeistaramótinu í Katowice í Póllandi í dag.

Færeyjar eru á toppi riðilsins með þrjú stig en Ísland er í þriðja sæti með eitt stig. Rúmenía, sem er með tvö stig í öðru sæti, mætir Norður-Makedóníu, sem er án stiga, seinna í dag.

Mikið jafnræði var með liðunum í leiknum en Færeyjar voru með tveggja marka forystu í hálfleik, 21:19.

Íslensku strákarnir gerðu vel og komust yfir í fyrsta skiptið í síðari hálfleik þegar tvær mínútur voru eftir, 35:34. Færeyjar náðu hins vegar að jafna metin á síðustu sekúndu leiksins með marki úr vítakasti.

Elmar Erlingsson átti ótrúlegan leik en hann skoraði 17 mörk. Össur Haraldsson og Skarphéðinn Ívar Einarsson skoruðu sex mörk hvor.

• Blogga um frétt