Jibril Rajoub, forseti knattspyrnusambands Palestínu, sagði í morgun að ákvörðun Argentínu um að aflýsa fyrirhuguðum vináttulandsleik gegn Ísrael í Jerúsalem jafngilti því að Ísrael væri sýnt rauða spjaldið.
„Með þessu fær Ísrael að líta rauða spjaldið frá öllum,“ sagði Rajoub við fréttamenn í morgun. Við hlið hans var blað þar sem stóð: „Takk Messi, frá Palestínu“.
Rajoub bætti því við að Palestínumenn hafi verið mótfallnir leiknum vegna þess að hann átti að fara fram í Jerúsalem.
„Ef leikurinn hefði verið spilaðu í Haifa, eins og upprunalega var gert ráð fyrir, hefðum við ekki sagt neitt,“ sagði Rajoub.
Hann hafði áður hvatt fólk til að brenna myndir af Lionel Messi og treyjur með nafni hans ef Messi léki gegn Ísrael í Jerúsalem.