Heimamenn slógu met í upphafsleiknum

Heimamenn í Rússlandi fóru vel af stað á HM í fótbolta sem hófst þar í landi í dag. Rússland vann þá öruggan 5:0-sigur á Sádi-Arabíu á Luzhniki-vellinum í Moskvu í upphafsleik keppninnar. Rússar bættu 68 ára gamalt met varðandi stærsta sigur í upphafsleik HM, en Brasilía vann Mexíkó 4:0 í Úrúgvæ árið 1950.

Juri Gazinskij kom Rússum yfir á 12. mínútu með skallamarki af stuttu færi eftir góða fyrirgjöf Aleksandr Golovin. Alan Dzagoev fór meiddur af velli skömmu síðar, en hann virtist hafa tognað aftan í læri. 

Það reyndist lán í óláni fyrir Rússana því Denis Tsjerishev kom inn á fyrir hann og skoraði tveimur mínútum fyrir lok fyrri hálfleiks. Hann lék þá skemmtilega á varnarmann og skoraði með góðu skoti upp í hornið og var staðan 2:0 í hálfleik. 

Seinni hálfleikur var rólegur framan af, en Rússarnir líklegri til að bæta við en slakt lið Sádi-Arabíu að minnka muninn. Á 70. mínútu kom Artem Dzjuba inn á sem varamaður og aðeins mínútu síðar var hann búinn að skalla knöttinn í markið eftir fyrirgjöf Aleksandr Golovin, sem lagði upp sitt annað mark. 

Rússarnir voru ekki hættir því Denis Tsjerishev skoraði sitt annað mark í uppbótartíma er hann kláraði með glæsibrag, utanfótar upp í samskeytin. Fimmta markið kom á fjórðu mínútu uppbótartímans er Aleksandr Golovin kórónaði glæsilegan leik sinn með marki beint úr aukaspyrnu og þar við sat. 

Þrír leikir fara fram á morgun. Sá fyrsti er á milli Egyptalands og Úrúgvæ kl. 12, síðan tekur við leikur Marokkó og Íran kl. 15 og síðast en ekki síst er stórleikur Portúgala og Spánverja kl. 18.  
mbl.is
L M Stig
1 Rússland 2 8 6
2 Úrúgvæ 2 2 6
3 Egyptaland 2 1 0
4 Sádi-Arabía 2 0 0
L M Stig
1 Spánn 2 4 4
2 Portúgal 2 4 4
3 Íran 2 1 3
4 Marokkó 2 0 0
L M Stig
1 Frakkland 2 3 6
2 Danmörk 2 2 4
3 Ástralía 2 2 1
4 Perú 2 0 0
L M Stig
1 Króatía 2 5 6
2 Ísland 1 1 1
3 Argentína 2 1 1
4 Nígeria 1 0 0
L M Stig
1 Serbía 1 1 3
2 Sviss 1 1 1
3 Brasilía 1 1 1
4 Kostaríka 1 0 0
L M Stig
1 Svíþjóð 1 1 3
2 Mexíkó 1 1 3
3 Þýskaland 1 0 0
4 Suður-Kórea 1 0 0
L M Stig
1 Belgía 1 3 3
2 England 1 2 3
3 Túnis 1 1 0
4 Panama 1 0 0
L M Stig
1 Senegal 1 2 3
2 Japan 1 2 3
3 Pólland 1 1 0
4 Kólumbía 1 1 0
Sjá alla riðla