„Það er gríðarlega svekkjandi að tapa þessum leik, sérstaklega ef við horfum á það hvernig fyrri hálfleikurinn spilaðist,“ sagði Gylfi Þór Sigurðsson, miðjumaður íslenska landsliðsins í knattspyrnu í samtali við RÚV eftir 2:0 tap liðsins gegn Nígeríu í annarri umferð D-riðils heimsmeistaramótsins í Volgograd í dag.
Ahmed Musa skoraði bæði mörk Nígeríu í síðari hálfleik en íslenska liðið er nú í þriðja sæti D-riðils með 1 stig, líkt og Argentína en Króatía er á toppi riðilsins með 6 stig og Nígería er í öðru sætinu með 3 stig. Ísland þarf því að vinna Króata í lokaleik sínum í riðlinum, 26. júní næstkomandi í Rostov og treysta á að Nígería tapi stigum gegn Argentínu.
„Við vorum opnir í seinni hálfleik sem er mjög ólíkt okkur og þeir voru að fá mikið af skyndisóknum, við fáum svo víti þarna í seinni hálfleik til þess að minnka muninn og það er erfitt að taka þessu. Ég bara hitti ekki markið í vítaspyrnunni, það var ekki flóknara en það.“
Gylfi telur að liðið hafi ætlað sér um of í síðari hálfleik og því fór sem fór.
„Það er erfitt að átta sig á því nákvæmlega hvað gerist hjá okkur í seinni hálfleik, svona stuttu eftir leik. Kannski ætluðum við okkur of mikið á of skömmum tíma í staðinn fyrir að vera bara rólegir og þéttir eins og í fyrri hálfleik. Okkur gengur oftast best þegar að við spilum þannig og við fáum alltaf okkar færi. Við vorum að reyna skora snemma og það fór gekk engan vegin upp í dag.“
Þrátt fyrir tap í dag hefur Gylfi ekki gefist upp og telur að það séu ennþá möguleikar að komast áfram í sextán liða úrslit keppninnar.
„Fyrri hálfleikurinn var flottur hjá okkur og við tökum það með okkur inn í leikinn gegn Króatíu. Möguleikinn er ennþá til staðar fyrir okkur og þetta er ekki búið ennþá,“ sagði Gylfi að lokum.