„Við þurfum alls ekki kraftaverk. Af hverju?,“ sagði landsliðsmaðurinn Birkir Bjarnason við norska blaðið Verdens Gang eftir 2:0 ósigur Íslendinga gegn Nígeríumönnum á HM í knattspyrnu í Volgograd í Rússlandi í gær.
Í lokaumferð D-riðilsins á þriðjudaginn mætir Ísland liði Króatíu og Nígería leikur við Argentínu. Króatar eru komnir áfram, eru á toppnum með 6 stig, Nígería er með 3 og Ísland og Argentína 1.
„Við eigum góða möguleika ennþá. Lítið bara á stigatöfluna,“ sagði Birkir við VG.