Hinn skrautlegi Diego Maradona, ein af goðsögnum fótboltans, hefur boðist til að taka við þjálfun argentínska landsliðsins í knattspyrnu án þess að þiggja greiðslu fyrir það.
Frá þessu greindi Maradona í sjónvarpsþætti í Venesúela en Maradona fylgdist grannt með sínum mönnum á HM í Rússlandi sem féllu úr leik í 16-liða úrslitunum þegar þeir töpuðu fyrir Frökkum 4:3 í frábærum leik.
Maradona er ekki alveg ókunnugur landsliðsþjálfarastarfinu en hann stýrði argentínska landsliðinu frá 2008 til 2010. Argentína tapaði fyrir Þýskalandi 4:0 undir hans stjórn á HM í S-Afríku 2010 en hann var rekinn úr starfi mánuði síðar.