Brasilíumaðurinn Ronaldo segir það tóma vitleysu að gagnrýna landa sinn Neymar. Ronaldo varð tvívegis heimsmeistari í fótbolta með þjóð sinni og Neymar er aðalstjarna brasilíska liðsins í dag.
Neymar hefur hins vegar verið gagnrýndur fyrir leikaraskap á mótinu, en Ronaldo er ekki sáttur við það. „Ég er ekki sammála því að hann dýfi sér. Hann er gáfaður leikmaður sem veit hvernig á að verja sig þegar hann er sparkaður niður. Dómarar eru ekki búnir að vera nægilega góðir í að vernda hann á mótinu,“ sagði Ronaldo.
„Það er tóm vitleysa að gagnrýna hann svona, þetta eru sjónvarpsstöðvar og dagblöð sem vantar efni,“ bætti hann við.