Óscar Ramírez heldur ekki áfram sem landsliðsþjálfari karlaliðs Kostaríka í fótbolta, þar sem árangur liðsins á HM í Rússlandi þótti heldur dapur.
Kostaríka fór alla leið í átta liða úrslit á HM í Brasilíu fyrir fjórum árum, en liðið fékk aðeins eitt stig í E-riðli í ár og féll úr leik. Kostaríka tapaði fyrir Serbíu og Brasilíu og gerði svo 2:2-jafntefli við Sviss.
Rodolfo Villalobos, forseti knattspyrnusambands Kostaríka, sagði á fréttamannafundi í dag að markmiðið væri að taka þátt á HM í Katar eftir fjögur ár, en til þess þyrfti nýjan landsliðsþjálfara.