Belgía leikur til undanúrslita á heimsmeistaramótinu eftir 2:1-sigur á Brasilíu í Kazan í Rússlandi í kvöld.
Belgar fóru af stað með látum og skoruðu fyrstu tvö mörkin. Það fyrsta reyndist sjálfsmark er Fernandinho skallaði boltann í eigið net eftir hornspyrnu Nacer Chadli á 13. mínútu. Á þeirri 31. var svo staðan 2:0 eftir bylmingsskot Kevin de Bruyne í fjærhornið eftir frábæran sprett Romelu Lukaku upp miðjan völlinn.
Brasilíu tókst að minnka muninn á 76. mínútu eftir að Renato Augusto stýrði boltanum í hornið með skalla eftir góða fyrirgjöf Philippe Coutinho en nær komust þeir ekki. Það eru því Belgar sem mæta Frökkum í undanúrslitunum en þetta er í fyrsta sinn í 32 ár sem þeir komast svo langt.
Brasilía er aftur á móti á heimleið og jafnframt síðasta landið utan Evrópu til að gera það. Belgar og Frakkar mætast í evrópskum undanúrslitaleik og á morgun keppa Króatar við Rússa og Englendingar við Svía um sæti í hinum leiknum.