Luis Enrique hefur verið ráðinn nýr þjálfari spænska landsliðsins í knattspyrnu en frá þessu greindi spænska knattspyrnusambandið nú rétt í þessu. Samningur hans er til tveggja ára.
Fernando Hierro stýrði spænska landsliðinu tímabundið á HM í Rússlandi en hann tók við þjálfun liðsins tveimur dögum fyrir fyrsta leik Spánverja á HM eftir að spænska knattspyrnusambandið rak Julen Lopetegui úr starfi.
Ástæða brottreksturs Lopetegui var sú að hann greindi forráðamönnum spænska landsliðsins ekki frá því að hann hefði tekið við tilboði Evrópumeistara Real Madrid um að taka við þjálfun liðsins.
Enrique hefur verið í fríi frá þjálfun eftir að hafa verið við stjórnvölinn hjá Barcelona frá 2014 til 2017. Undir hans stjórn varð Barcelona í tvígang Spánarmeistari, einu sinni Evrópumeistari og vann spænsku bikarkeppnina þrisvar sinnum. Hann lék 62 leiki með spænska landsliðinu og skoraði í þeim 12 mörk.