„Spila þeir Barcelona-bolta hjá Chelsea?“

Það var stutt í grínið hjá Antoine Griezmann á blaðamannafundi ...
Það var stutt í grínið hjá Antoine Griezmann á blaðamannafundi fyrir úrslitaleik á HM. AFP

Antoine Griezmann, sóknarmaður franska landsliðsins í knattspyrnu, var í góðu skapi á blaðamannafundi liðsins á dögunum. Frakkar mæta Króötum í úrslitum heimsmeistaramótsins sem fram fer í Rússlandi á morgun, í Moskvu. 

Frakkar slógu Belga úr leik í undanúrslitum keppninnar en margir af leikmönnum belgíska landsliðsins voru svekktir með tapið og skutu fast á franska liðið í leikslok. „Frakkarnir skora með skalla eftir hornspyrnu og gera svo lítið annað en að verjast. Ég hefði frekar viljað tapa fyrir Brasilíu í átta liða úrslitunum, þeir reyndu alla vega að spila knattspyrnu. Frakkar eru ekki fótboltalið,“ sagði Thibaut Courtois, markmaður Belga eftir leikinn.

„Heldur Thibaut Courtois að hann sé að spila Barcelona-bolta hjá Chelsea?“ sagði Griezmann á blaðamannafundi í vikunni. „Mér er sama hvað þeir segja og mér er sama hvernig við spiluðum, við unnum leikinn. Það sama verður uppi á teningnum í úrslitaleiknum á sunnudaginn. Mér er alveg sama hvernig við vinnum en við ætlum okkur sigur. Við ætlum okkur að bæta við stjörnu á franska búninginn,“ sagði framherjinn að lokum.

mbl.is