Heimildir herma að hreyfing Talibana í Afganistan hafi hagnast um milljarða króna á uppbyggingu fyrir heimsmeistaramót karla í fótbolta í Katar. Breski miðillinn, Telegraph, greinir frá.
Heimildir miðilisins herma að Talibanar hafi nýtt greiðslur frá yfirvöldum í Katar vegna framlags Talibana til friðarviðræðna við Vesturveldin, greiðslur sem voru samþykktar af bæði stjórnvöldum í Bandaríkjunum og Sameinuðu þjóðunum, til þess að fjárfesta í vinnuvélum sem leigðar hafi verið út til verktaka í Katar.
Sumir meðlimir hreyfingarinnar eiga að hafa átt allt að tug vinnuvéla og eru sagðir hafa hagnast um tugi þúsunda punda í hverjum mánuði fyrir leigu á hverri vinnuvél.
Frá árinu 2013 til ársins 2020 var forysta Talibana með höfuðstöðvar í Doha, höfuðborg Katar, í eignum sem talað var um að stærð smárra kastala. Flestir forystumenn hreyfingarinnar hafa nú flutt aftur til Afganistan.
Talibanar vísa ásökunum breska miðilsins á bug en heimildir miðilsins herma að Talibönum hafi verið greitt með reiðufé sem síðar hafi verið lagt inn á bankareikninga hreyfingarinnar til þess að dylja slóð peninganna.
Telegraph segir í umfjöllun sinni að miðillinn hafi óskað eftir viðbrögðum frá Alþjóðaknattspyrnusambandinu, FIFA, en ekki fengið.