Magnaður Mbappé skaut Frökkum í 8-liða úrslit

Evrópuslag Frakklands og Póllands í 16-liða úrslitum heimsmeistaramóts karla í fótbolta lauk með 3:1-sigri Frakka á Al Thumama-vellinum í Katar í dag.

Oliver Giroud skoraði fyrsta mark leiksins á 44. mínútu með laglegri afgreiðslu eftir sendingu frá Kylian Mbappé. Með þessu marki er Giroud kominn með 52 mörk fyrir franska landsliðið, mest allra. 

Mbappé var svo sjálfur á ferðinni og setti annað mark Frakka á 74. mínútu með góðu skoti. Mbappé skoraði svo sitt annað mark og þriðja mark Frakka á 90. mínútu með neglu í fjærhornið. Mbappé er nú með fimm mörk á þessu heimsmeistaramóti og níu samtals.

Robert Lewandowski setti svo sárabótarmark fyrir Pólverja á 9. mínútu uppbótartíma. 

Frakkland vann D-riðill keppninnar en Pólland endaði í öðru sæti C-riðilsins. Frakkland mætir annaðhvort Englandi eða Senegal í 8-liða úrslitunum. 

Fyrsti stundarfjórðungur leiksins var mjög líflegur. Frakkarnir héldu mestmegnis boltanum og kantmennirnir Kylian Mbappé og Ousmane Dembélé léku vel á varnarmenn Pólverja. 

Dembélé vann svo boltann á miðsvæðinu á 17. mínútu, fór fram hjá Grzeg­orz Krychowiak, og kom sér í gott skotfæri en skot hans var laust og neðarlega og beint í fangið á Wojciech Szczesny.

Hætta skapaðist inn í teig Pólverja á 20. mínútu er Griezmann tók boltann niður og reyndi að finna Oliver Giroud. Pólverjarnir komu þó boltanum í burtu og geystust í sókn. Þar fékk Lewandowski boltann nokkuð utan teigs og lét bara vaða en fram hjá fór boltinn, þó þetta hafi verið fínasta tilraun hjá framherjanum. 

Á 29. mínútu fengu Frakkarnir dauðfæri. Þá unnu þeir boltann á miðsvæðinu, Antoine Griezmann kom honum á Dembélé sem sendi hann þvert fyrir markið á Giroud sem var með opið mark fyrir framan sig en setti boltann fram hjá.

Mbappé var enn og aftur líflegur á 35. mínútu er hann lék léttilega á Matty Cash vinstra megin í teignum og negldi boltanum en Szczesny varði vel frá honum. 

Skothríð var svo að marki Frakkana á 38. mínútu. Þá sundurspiluðu Pólverjar þá frönsku og Bartosz Bereszynski gaf boltann þvert fyrir á Piotr Zielinski sem var í góðri skotstöðu en skot hans var slakt og beint á Hugo Lloris. Hann fékk svo boltann aftur til sín en setti hann í Theo Hernández í seinna skiptið. Þar rann boltinn til Lewandowski sem ætlaði að rúlla honum inn en Raphael Varane bjargaði á marklínu. Þvílík færi. 

Frakkar refsuðu Pólverjum sex mínútum síðar. Þá fékk Mbappe boltann frá Dayot Upamecano og sendi Giroud í gegn. Framherjinn tók á móti boltanum og setti hann svo snyrtilega í fjærhornið fram hjá Szszesny og Frakkarnir voru þá komnir yfir, 1:0. 

Pólverjar fengu svo gott færi í næsta sókn en Jakub Kaminski tók þá boltann niður í teignum og skaut en varnarmenn Frakklands komust fyrir skotið. 

Frakkarnir héldu áfram að leika listir sínar í byrjun síðari hálfleiks og meðal annars setti Giroud hjólhestaspyrnu í netið en dómarinn var búinn að dæma á Varane áður og markið stóð því ekki.

Giroud fékk svo aftur færi á 66. mínútu er Jules Koundé sendi boltann þvert fyrir á hann en framherjinn setti boltann í hliðarnetið.

Á 74. mínútu var svo komið að Kylian Mbappé. Þá kom Griezmann boltanum burt úr teig Frakka. Þar rataði boltinn til Giroud sem tók frábærlega á móti honum og kom boltanum á Dembélé sem fann Mbappé vinstra megin. Mbappé tók á móti boltanum sallarólegur og setti hann ofarlega fyrir mitt markið fram hjá varnarmönnum Pólverja og Szczesny og kom Frökkum í afar þægilega stöðu, 2:0.

Mbappé bætti svo við sínu öðru marki á 90. mínútu. Þá fékk hann boltann frá Marcus Thuram vinstra megin í teignum, tók eina snertingu til hliðar, og negldi boltanum í fjærhornið. Stórglæsilegt mark hjá stórstjörnu Frakka.

Pólland fékk svo vítaspyrnu á sjöundu mínútu uppbótartíma er boltinn fór í höndina á Upamecano. Lewandowski steig á punktinn en Lloris varði frá honum. 

Lloris var þó búinn að stíga af línunni og leikmenn Frakka voru mættir inn í sinn eigin teig áður en vítið var tekið og því fékk Lewandowski að taka spyrnuna aftur. 

Þá gekk honum betur, sendi Lloris í vitlaust horn, og renndi boltanum í netið, 1:3. 

Stuttu eftir það flautaði dómarinn til leiksloka og það eru því Frakkar sem fara í 8-liða úrslitin en Pólverjar eru á heimleið. 

Lið Frakk­lands: (4-3-3)
Mark: Hugo Ll­or­is.
Vörn: Ju­les Koundé (Axel Disasi 92.), Rap­hael Vara­ne, Dayot Upa­mecano, Theo Her­nández.
Miðja: Aurélien Tchouaméni (Youssouf Fofana 66.), Antoine Griezmann, Adrien Rabiot.
Sókn: Ousma­ne Dembé­lé (Kingsley Coman 76.), Oli­ver Giroud (Marcus Thuram 76.), Kyli­an Mbappé.

Lið Pól­lands: (4-5-1)
Mark: Wojciech Szczesny.
Vörn: Matty Cash, Kamil Glik, Jakub Kiwi­or (Jan Bednarek 87.), Bartosz Bereszynski.
Miðja: Jakub Kam­inski (Nicola Zalewski 71.), Piotr Ziel­inski, Grzeg­orz Krychowiak (Krystian Bielik 71.), Sebastian Szym­anski (Arkadiusz Milik 64.), Przemyslaw Fran­kowski (Kamil Grosicki 87.).
Sókn: Robert Lew­andowski.