Króatíski miðjumaðurinn Marcelo Brozovic er vinnusamasti leikmaður heimsmeistaramótsins, en hann bætti eigið HM-met yfir mestu hlaup í einum leik á mótinu gegn Japan á mánudag.
Brozovic hljóp alls 16,7 kílómetra í leiknum, sem Króatía vann í vítakeppni, og tryggði sér í leiðinni sæti í átta liða úrslitum. Lék Brozovic allan leikinn með framlengingu meðtalinni.
Fyrra met Brozovic var frá því í Rússlandi fyrir fjórum árum, er hann hljóp 16,3 kílómetra í undanúrslitum gegn Englandi.
Rétt eins og gegn Japan var leikurinn við England framlengdur og fékk Brozovic því auka hálftíma til að hreyfa sig.