Þriggja ára á fyrsta stórmótinu

„Það er vel passað upp á það að allir séu í réttum litum og vel málaðir,“ segir Viktor Lekve, sem staddur er í Ólympíuhöllinni í München á leik Íslands og Króatíu á HM í handbolta.

„Það er allt að verða vitlaust hérna. Sérsveitin stjórnar stemmningunni gríðarlega vel og við erum að hita upp raddböndin fyrir leik,“ sagði hann er stuðningsmenn hituðu upp fyrir leikinn í stúkunni. 

Frétt af mbl.is

Króatar fái ekki yfirhöndina í stúkunni

Viktor er staddur í München ásamt konunni sinni, Heiðrúnu Evu, og þriggja ára dóttur þeirra. „Við ákváðum að fara með stelpuna á fyrsta stórmótið,“ segir Viktor, sem er uppeldisbróðir Bjarka Más Elíssonar, hornamanns í landsliðinu.

Hann segist hafa séð einhverja Króata á svæðinu, en tugir þúsunda Króata búa í München. „Við lentum einmitt á Uber-bílstjóra frá Króatíu í gær.“

Fjölskyldan ætlar að vera í Þýskalandi yfir riðlakeppnina en Viktor efast um að vinnan leyfi að þau verði lengur, komist strákarnir upp úr riðlinum. „En það er náttúrulega draumurinn að geta fylgt þeim alla leið.“

• Blogga um frétt