Hans Óttar Lindberg, elsti og leikjahæsti leikmaðurinn í danska landsliðshópnum í handknattleik, verður ekki með liðinu gegn Túnis í Herning á heimsmeistaramótinu í kvöld.
Lindberg, sem á íslenska foreldra, meiddist í upphafsleik Dana er þeir unnu sannfærandi 39:16-sigur á Síle í Kaupmannahöfn á fimmtudaginn. Hann missti af tveimur vináttuleikjum stuttu fyrir mót vegna meiðsla en var þó klár í slaginn fyrir fyrsta leik þar sem meiðslin virðast hafa tekið sig upp að nýju.
Lindberg er 37 ára gamall hornamaður, á að baki 261 landsleik og í þeim hefur hann skorað 729 mörk en hann lék sinn fyrsta landsleik árið 2003. Johan P. Hansen, leikmaður Bjerringbro í Danmörku, kemur inn í leikmannahópinn í stað Lindberg en ekki liggur fyrir hversu lengi hann verður meiddur.