Enn eitt rótburst Norðmanna

Noregur er með öruggt sæti í milliriðlum heimsmeistaramótsins í handknattleik eftir að hafa rótburstað lið Síle í C-riðli í Herning í kvöld, 41:20. Noregur hefur unnið alla fjóra leiki sína á HM til þessa með tíu mörkum eða meira.

Jafnt var á með liðunum þar til í stöðunni 4:4, þegar Norðmenn gáfu í. Þeir skoruðu fimm mörk gegn einu og byggðu hægt og bítandi upp forskot sitt. Þegar flautað var til hálfleiks munaði níu mörkum á liðunum, staðan 21:12 fyrir Noreg.

Norðmenn gáfu ekkert eftir í síðari hálfleik og voru fljótlega komnir með 16 marka forskot, 30:14. Þeir sigldu svo að lokum öruggum 21 marks sigri í höfn, 41:20, þar sem hinn 18 ára gamli Alexander Blonz fór fyrir liðinu með átta mörk. Estaban Salinas skoraði níu mörk fyrir Síle.

Norðmenn eru með fullt hús stiga í riðlinum, eins og Danir sem eiga þó eftir að mæta Austurríki í kvöld. Noregur hefur ekki gefið andstæðingum sínum neina miskunn á HM heldur unnu áður Túnis 34:24, Sádi-Arabíu 40:21, Austurríki 34:24 og nú Síle 41:20. Norðmenn mæta Dönum í lokaleiknum þar sem búast má við úrslitaleik um efsta sæti riðilsins.

Fyrsti sigur Serba

Serbar kræktu í sinn fyrsta sigur í A-riðli þegar liðið vann sameiginlegt lið Kóreu eftir spennuleik, 31:29. Kórea, sem hefur tapað öllum leikjum sínum til þessa, var þó tveimur mörkum yfir í hálfleik 16:14. Serbar jöfnuðu ekki fyrr en í stöðunni 22:22 en gengu þá á lagið og unnu með tveggja marka mun 31:29.

Vukasin Vorkapic skoraði sjö mörk úr sjö skotum fyrir Serba en Jeongu Kang var allt í öllu hjá Kóreu með 12 mörk. Serbía er nú með þrjú stig í riðlinum og mætir Þýskalandi í lokaleiknum á fimmtudag. Botnlið Kóreu mætir þá liði Brasilíu.

Serbinn Lazar Kukic með skot að marki Kóreu án þess að Jeong Jaewan komi vörnum við. AFP

• Blogga um frétt