Óvæntur sigur Brasilíu gegn Króatíu

Felipe Borges átti frábæran leik gegn Króötum og skoraði fimm ...
Felipe Borges átti frábæran leik gegn Króötum og skoraði fimm mörk. AFP

Brasilía gerði sér lítið fyrir og vann þriggja marka sigur gegn Króatíu í milliriðli 1, riðli okkar Íslendinga, á HM í handknattleik í Köln í dag en leiknum lauk með 29:26-sigri Brasilíu. Brasilía byrjaði leikinn mun betur og var fjórum mörkum yfir í hálfleik, 17:13.

Króatar hafa aldrei áður tapað fyrir Brasilíu í handknattleik karla.

Króatar reyndu hvað þeir gátu að koma til baka í síðari hálfleik en áttu erfitt með að vinna upp forskot Brasilíu. Króötum tókst að minnka muninn niður í eitt mark í 26:25 þegar átta mínútur voru til leiksloka en lengra komust þeir ekki og Brasilía fór með óvæntan sigur af hólmi.

Felipe Borges var markahæstur í liði Brasilíu með fimm mörk en hjá Króötum var það Domagoj Duvnjak sem skoraði mest eða sex mörk. Með sigrinum er Brasilía komin í fimmta sæti milliriðils 1 í 2 stig og upp fyrir okkur Íslendinga en Króatía er áfram í þriðja sæti riðilsins með 4 stig.

Í milliriðli 2 vann Ungverjaland fimm marka sigur gegn Túnis þegar liðin mættust í Herning en lokatölur urðu 26:21, Ungverjalandi í vil. Ungverjar leiddu allan leikinn og voru tveimur mörkum yfir í hálfleik og var munurinn á liðunum sex mörk þegar tíu mínútur voru til leiksloka.

Zsolt Balogh fór á kostum í liði Ungverja sem eru í þriðja sæti milliriðils 2 með 3 stig en Balogh skoraði 9 mörk í leiknum. Túnis er stigalaust í neðsta sæti riðilsins en Mosbah Sanai og Oussama Boughanmi skoruðu fimm mörk hvor fyrir Túnis.

mbl.is