Meiðsli danska línumannsins René Toft Hansen eru alvarlegri en fyrst var talið, en hann varð fyrir nárameiðslum í sigri Dana gegn Norðmönnum á heimsmeistaramótinu í handknattleik á dögunum.
Hansen var fyrst skipt út úr danska hópnum vegna meiðslanna og kom bróðir hans, Henrik Toft Hansen, inn í hans stað. René Toft hélt þá til félagsliðs síns, Veszprém í Ungverjalandi, og gekkst undir nánari skoðun.
Veszprém hefur nú gefið það út að hann muni þurfa að gangast undir aðgerð vegna meiðslanna í dag. Laga á rifu í náravöðva og verður hann að öllum líkindum lengi frá, eins og það er orðað á heimasíðu Veszprém.