Íslenska karlalandsliðið í handknattleik æfði í æfingahöllinni í Kaíró í dag en liðið mætir Portúgal í fyrsta leik sínum í F-riðli HM í Egyptalandi í New Capital Sports-höllinni í Kaíró á morgun.
Það var létt yfir mönnum á æfingu dagsins en liðið mætti til Egyptalands á mánudagskvöldið síðasta.
Leikurinn gegn Portúgal verður þriðji leikur liðanna á rúmrí viku en liðin hafa mæst tvívegis í aðdraganda HM í undankeppni EM.
Portúgal hafði betur í fyrri leik liðanna í Matosinhos í Portúgal, 26:24, en Ísland vann síðari leik liðanna á Ásvöllum með yfirburðum, 32:23.