Norðmenn unnu öruggan sigur á Austurríki í síðasta leiknum í E-riðli heimsmeistaramóts karla í Egyptalandi í kvöld og þar með verður leikjaröð íslenska liðsins í milliriðlinum á þann hátt sem útlit var fyrir.
Lokatölur urðu 38:29 fyrir Norðmenn sem völtuðu yfir andstæðinga sína í seinni hálfleik eftir að staðan í hálfleik var 20:17. Frakkar unnu því riðilinn með 6 stig, Norðmenn fengu 4 stig, Svisslendingar 2 og Austurríkismenn ekkert.
Frakkar fara áfram með fjögur stig, Norðmenn með tvö og Svisslendingar ekkert. Ísland mætir Sviss í fyrsta leiknum á miðvikudaginn, síðan Frakklandi á föstudaginn og loks Noregi á sunnudaginn.
Milliriðillinn hefst því á þann veg að Portúgal og Frakkland eru með 4 stig, Ísland og Noregur 2 stig en Sviss og Alsír eru án stiga.
Sander Sagosen skoraði níu mörk fyrir Noreg í kvöld og hefur því gert 30 mörk í fyrstu leikjum norska liðsins.
Noregur: Sander Sagosen 9, Alexandre Christoffersen 7, Kent Robin Tonnesen 7, Christian O`Sullivan 5, Goran Sogard Johannessen 3, Kevin Maagero Gulliksen 3, Petter Overby 2, Thomas Solstad 1, Kristian Bjornsen 1.
Austurríki: Robert Weber 6, Tobias Wagner 6, Lukas Hutecek 4, Sebastian Frimmel 3, Lukas Herburger 2, Jakob Jochmann 2, Julian Ranftl 2, Nikola Stevanovic 2, Antonio Juric 1, Maximilian Hermann 1.