Einhverjir kættust yfir því að Ísland ætti alla vega einn léttan leik fyrir höndum í milliriðli heimsmeistaramótsins í handbolta.
Svisslendingar komu inn í lokakeppnina á allra síðustu stundu og mættu á leikstað nokkrum tímum fyrir sinn fyrsta leik eftir að Bandaríkin þurftu að draga sig úr keppni.
En þeir unnu granna sína frá Austurríki, stóðu ágætlega í silfurliði síðasta HM, Noregi, og í gærkvöld munaði engu að Svisslendingar tækju stig af Frökkum.
Guðmundur Guðmundsson landsliðsþjálfari fór örugglega beint að skoða þann leik eftir að leik Íslands og Marokkó lauk í gærkvöld enda er sigur gegn Sviss annað kvöld algjörlega nauðsynlegur til þess að íslenska liðið eigi einhverja möguleika á að ógna Frökkum og Norðmönnum í baráttu um sæti í átta liða úrslitum mótsins.
Lítið hefur heyrst af afrekum Svisslendinga um árabil en þeir áttu harðsnúið lið á árum áður með stórskyttuna Marc Baumgartner í broddi fylkingar.
Bakvörð Víðis í heild sinni er að finna í Morgunblaðinu í dag.