Skyttan öfluga Mathias Gidsel í heimsmeistaraliði Dana var útnefndur mikilvægasti leikmaður heimsmeistaramóts karla sem lauk með úrslitaleik Danmerkur og Frakklands í Stokkhólmi í gærkvöld.
Gidsel varð markahæsti leikmaður mótsins og skoraði 60 mörk fyrir danska liðið en hann er 23 ára gamall, örvhent skytta, og spilar með Füchse Berlín í Þýskalandi. Fyrir tveimur árum var hann valinn efnilegasti handboltamaður heims.
Þjóðverjinn Juri Knorr var valinn efnilegasti leikmaður mótsins en hann og Gidsel eru hins vegar ekki í sjö manna úrvalsliði HM sem er þannig skipað:
Markvörður: Andreas Wolff (Þýskalandi)
Hægra horn: Niclas Ekberg (Svíþjóð)
Hægri skytta: Alex Dujshebaev (Spáni)
Miðjumaður: Nedim Remili (Frakklandi)
Vinstri skytta: Simon Bogetoft Pytlick (Danmörku)
Vinstra horn: Ángel Fernández Pérez (Spáni)
Línumaður: Ludovic Fabregas (Frakklandi)