Veit hvernig á að fá mig í gang

Viktor Gísli var kampakátur í leikslok.
Viktor Gísli var kampakátur í leikslok. mbl.is/Eyþór Árnason

„Mér líður mjög vel. Ég er mjög sáttur með þetta,“ sagði Viktor Gísli Hallgrímsson, maður leiksins í sigri Íslands á Slóveníu í úrslitaleik G-riðils á HM í handbolta í kvöld.

Íslenska liðið náði forskoti snemma leiks og hélt því út allan leikinn. Urðu lokatölur 23:18.

„Þetta var aðeins stressandi í lokin. Markvörðurinn þeirra varði líka vel. Ég var aðeins stressaður þegar það var korter eftir en svo sigldum við þessu heim,“ sagði Viktor.

Hann átti sjálfur stórleik og þeir Ýmir Örn Gíslason og Elliði Snær Viðarsson voru góðir þar fyrir framan.

„Þegar Ýmir og Elliði fá leyfi til að lemja menn aðeins eru þeir glaðir. Það hjálpar mér helvíti mikið. Við lögðum upp með að taka vel á þeim og gera þetta óþægilegt. Þetta eru eiginlega allt miðjumenn og þeim finnst ekki gaman að láta snerta sig.“

Viktor Gísli Hallgrímsson fagnar með Björgvini Páli Gústavssyni í leikslok.
Viktor Gísli Hallgrímsson fagnar með Björgvini Páli Gústavssyni í leikslok. mbl.is/Eyþór Árnason

En hvað virkaði vel hjá Viktori í kvöld?

„Ég var að lesa vel hvenær gegnumbrotin voru að koma og var kominn í góða stöðu þegar skotin komu. Þetta voru eiginlega bara skot í gegnumbrotum og lítið fyrir utan. Við vorum vel undirbúnir og þetta gekk vel.“

Roland Eradze, markvarðarþjálfari Íslands í Zagreb, þjálfaði Viktor þegar hann var ungur drengur og þeir vinna vel saman.

„Nú greinum við þennan leik og fáum Roland til að segja mér hvað ég get gert betur. Nú endurheimtum við vel og einbeitum okkur að næsta verkefni. Roland hjálpar mikið. Hann var með mig þegar ég var helvíti ungur og veit hvernig á að fá mig í gang.“

mbl.is
Fleira áhugavert
Fleira áhugavert