Íslenska U20 ára landslið karla í íshokkíi tapaði naumlega fyrir heimamönnum, 3:2, í síðasta leik sínum í 3. deild heimsmeistaramótsins sem nú stendur yfir í Búlgaríu.
Edmunds Induss kom Íslandi í 1:0 með eina marki 1. leikhluta en Búlgararnir skoruðu eina marki 2. leikhluta og jöfnuðu leikinn. Axel Orongan kom Íslandi aftur yfir í 3. leikhluta en Búlgarar jöfnuðu tíu mínútum fyrir leikslok og skoruðu svo sigurmarkið í blálokin.
Ísland féll niður úr öðru sæti í það þriðja með tapinu, en getur fallið neðar eftir leik Kínverja og Ástrala sem leika síðasta leik mótsins síðar í dag.