„Þetta er glatað, hreinlega alveg ömurlegt. Við þurfum að rífa okkur í gang fyrir næsta ár og koma okkur strax upp aftur," sagði Aron Knútsson, landsliðsmaður í íshokkí í samtali við mbl.is eftir 5:2-tap á móti Serbíu í síðasta leik Íslands í 2. deild heimsmeistaramótsins í íshokkí.
Ísland tapaði öllum fimm leikjum sínum á mótinu og féll þar af leiðandi úr A-riðli og niður í B-riðilinn. Aron var ekki sáttur við spilamennsku íslenska liðsins á mótinu.
„Við náðum ekki að skora og það bitnaði oft á vörninni. Þegar við klikkuðum í sókninni komust liðin oft í skyndisóknir og við gerðum klaufaleg mistök í vörninni. Þessi lið eru með góða einstaklinga og mistök eru dýrkeypt."
Íslandi gekk bölvanlega að skora manni fleiri á mótinu á meðan andstæðingurinn skoraði mörg mörk er íslenska liðið var manni færri.
„Í kvöld vorum við fínir fyrstu tvær loturnar en í þriðju lotunni gerðist ekki neitt. Ég veit ekki hversu oft við vorum manni fleiri en við náðum ekki að setja pökkinn inn. Það á að vera auðveldara að skora manni fleiri en við höfum verið slakir."
Aron segir íslenska liðið þurfa vera harðar af sér, til að komast strax aftur upp í A-riðilinn.
„Við þurfum að koma sterkir inn og spila okkar leik. Við höfum ekki verið að gera það á þessu móti. Við erum þekktir fyrir að vera hraðir og harðir og að það sé erfitt að spila á móti okkur en við höfum ekki sýnt það á þessu móti. Við þurfum að laga það," sagði Aron að endingu.