Svíar aftur heimsmeistarar

Svíar fagna heimsmeistaratitlinum í kvöld.
Svíar fagna heimsmeistaratitlinum í kvöld. AFP

Svíar urðu í kvöld heimsmeistarar í íshokkí karla annað árið í röð þegar þeir sigruðu Sviss, 3:2, í úrslitaleik heimsmeistaramótsins í Kaupmannahöfn.

Filip Forsberg skoraði sigurmarkið í vítakeppni en staðan var 2:2 eftir venjulegan leiktíma. Í venjulegum leiktíma skoruðu Gustav Nyqvist og Mika Zibanejad fyrir Svía en Nino Niederreiter og Timo Meier fyrir Sviss.

Þetta er besti árangur Svisslendinga í sögunni en þeir höfðu aldrei áður komist í undanúrslit á HM og aðeins tvívegis náð að komast í átta liða úrslit mótsins.

Bandaríkin fengu bronsverðlaunin með sigri á grönnum sínum Kanadamönnum, 4:1. Í fyrra unnu Svíar sigur á Kanada í úrslitaleiknum og Kanada hafði orðið heimsmeistari næstu tvö ár á undan, 2015 og 2016.

Liðin sem féllu út í átta liða úrslitum í ár voru Lettland, Tékkland, Rússland og Finnland en sextán lið leika jafnan í lokakeppninni. Slóvakía og Danmörk urðu númer 9-10, Frakkland og Þýskaland númer 11-12, Austurríki og Noregur númer 13-14 og Hvíta-Rússland og Suður-Kórea urðu neðst í riðlunum tveimur og töpuðu öllum sínum leikjum.

mbl.is