Washington Capitals er einum sigri frá því að tryggja Stanley-bikarinn en liðið er komið í 3:1 í baráttunni um bikarinn í NHL-deildinni í íshokkí.
Washington Capitals hrósaði 6:2 sigri gegn Las Vegas Golden Knights í fjórða úrslitaleiknum í nótt og getur á fimmtudaginn unnið Stanley-bikarinn í fyrsta sinn í 43 ára sögu félagsins þegar liðin eigast við í Las Vegas.
T. J. Oshie, John Carlson, Brett Conolly, Michal Kempný, Devante Smith-Pelly og Tom Wilson skoruðu mörk Washington Capitals en Rússinn Evgeny Kuznetsov gaf fjórar stoðsendingar í leiknum. James Neal og Reilly Smith settu mörkin fyrir Las Vegas Golden Knights.