Skautafélag Akureyrar vann afar dramatískan 5:4-sigur gegn búlgörsku meisturunum í Irvis-Skate í fyrsta leik sínum í undankeppni Evrópubikars félagsliða í íshokkí í Sófíu í Búlgaríu en SA hafði betur í vítakeppni. Leikurinn byrjaði ekki vel fyrir íslenska liðið en Irvis-Skate komst í 2:0 snemma leiks en Rúnar Rúnarsson minnkaði muninn fyrir SA á 17. mínútu og Ingvar Jónsson jafnaði metin fyrir SA undir lok fyrsta leikhluta.
Sigmundur Sveinsson skoraði eina mark annars leikhluta og kom SA yfir, 3:2, og Hafþór Sigrúnarson kom íslenska liðinu í 4:2 í upphafi þriðja leikhluta. Stanislav Muhachev minnkaði muninn fyrir búlgörsku meistarana á 48. mínútu og Andrei Thiurin jafnaði metin fyrir Irvis-Skate undir lok leiksins og staðan því jöfn eftir venjulegan leiktíma.
Því var gripið til framlengingar þar sem hvorugu liðinu tókst að skora. Í vítakeppninni hafði íslenska liðið svo betur en þeir Thomas Stuart-Dant og Andri Mikaelsson skoruðu fyrir SA í vítakeppninni en Adam Beukeboom, markmaður SA, átti stórleik í markinu og varði öll skot búlgarska liðsins sem skoraði ekki mark í vítakeppninni.
Fyrsti sigur íslenska liðsins því staðreynd en SA mætir tyrknesku meisturunum í Zeytinburnu frá Istanbúl á mirgyn og á sunnudag leikur liðið við ísraelsku meistarana Bat Yam.