Ísland vann sterkan 5:2-sigur á Mexíkó í öðrum leik sínum í 3. deild karla á heimsmeistaramóti 20 ára og yngri í íshokkí, en leikið er í Sófíu, höfuðborg Búlgaríu. Ísland vann Búlgaríu í gær og er því með fullt hús stiga og í toppsæti riðilsins.
Sölvi Freyr Atlason skoraði fyrsta mark Íslands með eina marki fyrstu lotunnar. Axel Snær Orongan, Gunnar Aðalgeir Arason og Atli Þór Sveinsson komu Íslandi í 4:0 í annarri lotu, áður en Mexíkóar minnkuðu muninn í 4:2 fyrir síðustu lotuna.
Í þriðju og síðustu lotunni var íslenska liðið hins vegar sterkara og Heiðar Örn Kristveigarson skoraði eina mark lotunnar og gulltryggði íslenskan sigur.
Ísland mætir Nýja-Sjálandi á fimmtudaginn kemur, en Nýja-Sjáland tapaði fyrir Mexíkó í gær, 0:5.