SR hafði betur gegn Fjölni, 8:5, í æsilegum leik í úrvalsdeild karla í íshokkíi, Hertz-deildinni, á skautasvellinu í Egilshöll í gærkvöldi.
Níels Hafsteinsson kom SR í forystu snemma og Ævar Arngrímsson tvöfaldaði forystuna seint í fyrstu lotu.
Kristján Kristinsson minnkaði muninn fyrir Fjölni skömmu síðar en Styrmir Maack bætti við þriðja marki SR áður en fyrsta lota var úti. Staðan var því 3:1, SR í vil, að henni lokinni.
Ævar kom SR í 4:1 í upphafi annarrar lotu. Falur Guðnason svaraði hins vegar með tveimur mörkum fyrir Fjölni með stuttu millibili og staðan var þá skyndilega orðin 4:3.
Styrmir bætti við sínu öðru marki og Daníel Magnússon komst einnig á blað hjá SR og staðan því orðin 6:3 áður en Martin Simanek minnkaði muninn fyrir Fjölni.
Staðan var þá 6:4 að annarri lotu lokinni.
Róbert Pálsson minnkaði muninn í 6:5 í þriðju og síðustu lotu en lengra komust heimamenn í Fjölni ekki þar sem Þorgils Eggertsson komst á blað hjá SR áður en Styrmir fullkomnaði þrennu sína.
Lokatölur urðu því 8:5.
SR er áfram í öðru sæti deildarinnar eftir sigurinn, nú með 11 stig.
Fjölnir er hins vegar í þriðja og neðsta sæti með fjögur stig.