Ari Gunnarsson, þjálfari Vals, hefði kosið framlag frá fleiri leikmönnum liðsins þegar liðið mætti Snæfelli í 14. umferð Domino's deildar kvenna í körfuknattleik í Valshöllinni í kvöld. Ari var hins vegar ánægður með þau batamerki sem liðið sýndi frá leik liðanna í Stykkishólmi fyrir jól.
„Við erum klárlega búin að bæta okkur síðan í leik liðanna fyrir jól. Það var hins vegar ekki nóg til þess að vinna sem er súrt. Ásigkomulagið er misjafnt á leikmönnum liðsins. Það fóru tveir leikmenn út til Bandaríkjanna og svo voru veikindi á nokkrum leikmönnum liðsins. Það er hins vegar engin afsökun og leikmenn hefðu þurfti að sýna aðeins meiri kjark til þess að næla í sigurinn,“ sagði Ari í samtali við mbl.is eftir leikinn í kvöld.
„Það veldur mér virkilegum áhyggjum hversu fáir leikmenn taka af skarið sóknarlega hjá okkur. Ég auglýsi eftir því að leikmenn mínir stígi upp og setja punkta í töfluna. Ég var óánægður með sóknarleikinn í seinni hálfleik. Þær náðu að ýta okkur út úr okkar aðgerðum sem er ekki nógu gott og við eigum að vera sterkari þegar slíkt gerist,“ sagði Ari enn fremur.