Íþróttir | Körfubolti | mbl | 6.9.2017 | 21:08 | Uppfært 21:49

Góður leikur Íslands sló Finna út af laginu

Pavel Ermolinskij í baráttu við Carl Lindbom í leik Íslands og Finnlands í kvöld. Pavel skoraði fjögur stig, tók fimm fráköst og gaf þrjár stoðsendingar í leiknum. AFP

Henrik Dettmann, þjálfari Finna, var að vonum ánægður á blaðamannafundi eftir sigurinn á Íslandi í kvöld, 83:79. Finnum hefur gengið framar vonum og þeir eru á leið í sextán liða úrslit í Tyrklandi þar sem þeir mæta Ítölum á laugardag. Hann sagði að Finnar hefðu ekki leikið sinn besta leik í kvöld og bætti við að það væri vegna góðs leiks íslenska liðsins.

„Mér fannst við spila fjóra góða leiki á þessu móti,“ sagði Gerald Lee, miðvörður í finnska liðinu, á blaðamannafundinum eftir leikinn. „Þessi var ekki svo góður. Við leyfðum Íslendingum að gera það sem þeir vildu og þeir spiluðu mjög vel í dag. Við gerðum okkur þetta erfitt fyrir. Við hefðum átt að koma betur innstilltir inn í leikinn og reyna að gera út um hann snemma.“

Henrik Dettmann, þjálfari finnska liðsins, sagði að hann hefði engu við þetta að bæta. „Leikmenn mínir eru klárir,“ sagði hann. „Þeir vita um hvað leikurinn snýst og góðir að greina hlutina. Ég þarf ekki að bæta neinu við.“

Þegar Dettman var beðinn að bæta samt einhverju við sagði hann að hann hefði reyndar átt að nefna það í upphafi. „Ísland á alla mína virðingu skilda,“ sagði hann. „Þeir spiluðu af mikilli hörku. Þetta er íslenskur körfubolti. Þeir gefast aldrei upp og ef maður er ekki alveg með á nótunum ná þeir þér. Við áttum í erfiðleikum með að finna taktinn og það væri ósanngjarnt að segja að við höfum spilað illa. Þeir spiluðu vel. Þeir gerðu það sem þeir áttu að gera. Trufla hjá okkur taktinn. Þeir brutu upp okkar leikstíl. Þeir mega eiga það. Ég vil líka nefna að Jón Arnór Stefánsson lék í kvöld sinn síðasta landsleik, ef ég skil það rétt. Ég var að spyrja sjálfan mig hvers vegna í ósköpunum hann spilaði svona vel í dag. Nú skil ég að það var smá aukahvatning.“

Það er rétt að taka fram að Jón Arnór sagði í kvöld að hann hefði enga ákvörðun tekið í þessum efnum.

Á lokasprettinum í leiknum höfðu dómarar mikið að segja og hafði það talsverð áhrif á gang hans. Dettmann var spurður um dóma sem féllu með Finnum. „Fengum við dóma eða þeir,“ sagði hann. „Ég tala venjulega ekki um dómgæslu við fjölmiðla. Ég tjái mig ekki einu sinni mikið á hliðarlínunni. Vegna þess að dómgæslan er hluti af leiknum. Þeir eru hér til að þjóna leiknum og gera sitt besta.“

Áhorfendur létu mikið í sér heyra á vellinum. Þeir íslensku studdu vel við liðið og Finnarnir, sem kalla sig úlfahjörðina, létu sitt ekki eftir liggja. Lee sagðist að það hefðu verið læti, hann áttaði sig á því núna þegar hann væri spurður, en hann hefði varla tekið eftir því í leiknum.

„Stemmingin var frábær,“ sagði Dettman. „Ég hef orðið vitni að ýmsu í körfubolta um ævina,“ sagði Dettman, „og ég hef alltaf sagt að finnsk körfuboltahefð ristir miklu dýpra en flestir skilja. Ég hef verið þjálfari í hátt í fjögur hundruð landsleikjum í 25 ár og veit um hvað ég er að tala. Við höfum kannski falið þetta, en þetta er hlið á finnskri menningu, sem við sýndum á þessu móti að er til staðar og ég er viss um að allir, sem hafa komið hingað hafi séð það.“

Dettman var spurður um næsta andstæðing. „Ítalir eru mikil körfuboltaþjóð,“ sagði hann. „Þeir spila fast. Við spiluðum við þá æfingaleik fyrir nokkru og það er óhætt að segja að þeir eru sigurstranglegri, við erum lítilmagninn og það er stutt í laugardag þegar flautað verður til leiks.“

Mikko Koivisto, einn af bakvörðum finnska liðsins, sem hvíldi í kvöld, sagði við mbl.is eftir leikinn að hann hefði verið erfiður. „Við vissum að þetta yrði erfiður leikur,“ sagði hann. „Ísland hefur leikið vel á þessu móti. Þeir eru með frábæra stuðningsmenn hér á staðnum. Við vildum byrja af krafti og að þetta yrði góður leikur. Andrúmsloftið var frábært, stuðningsmenn beggja liða voru frábærir og þetta var gaman. Og það var frábært fyrir okkur að ljúka mótinu með sigri.“

Finnum hefur gengið vel á mótinu, höfnuðu í öðru sæti í riðlinum og spurning hvað þeir fara langt. „Við sjáum til,“ sagði Koivisto. „Héðan af er maður úr leik þegar maður tapar. Við ætlum aðeins að njóta árangursins hér og síðan förum við að einbeita okkur að næsta andstæðingi, Ítalíu. Vonandi sigrum við þá og komumst áfram.“