Martin Hermannsson bætti persónulegt met sitt yfir stigaskor á yfirstandandi leiktíð þegar hann skoraði 29 stig í 90:84-tapi Chalons-Reims gegn Le Mans í frönsku efstu deildinni í körfubolta karla í kvöld.
Martin lék allar 40 mínúturnar með liði sínu og átti 7 stoðsendingar auk þess sem hann tók tvö fráköst.
Haukur Helgi Pálsson skoraði hins vegar fjögur stig þegar lið hans, Cholet, hafði betur á móti Pau Orthez á útivelli. Hann spilaði í 23 mínútur. Lokatölur í leiknum urðu 78:70 Cholet í vil.
Cholet er í níunda sæti deildarinnar með átta sigurleiki og jafnmarga tapleiki. Chalons-Reims er hins vegar í 12. sæti deildarinnar eftir sjö sigra og níu töp.
Á Spáni skoraði Tryggvi Snær Hlinason 3 stig fyrir Valencia og tók 2 fráköst í stórsigri liðsins á Zaragoza, 103:58.
Í B-deild kvenna á Spáni var Hildur Björg Kjartansdóttir með 9 stig og 11 fráköst í útisigri Leganés gegn Picken Claret, 61:43.