Ríkjandi meistarar Golden State Warriors máttu hafa sig alla við í háspennusigri gegn Toronto Raptors í NBA-deildinni í körfuknattleik í nótt.
Golden State skoraði hvorki fleiri né færri en 81 stig í fyrri hálfleik, sem þykir nú ekki óeðlilegur stigafjöldi í heilum leik. Staðan í hálfleik var 81:64 en Toronto-liðið barðist allt til loka og úr varð háspennuleikur. Golden State fagnaði að lokum naumum sigri, 127:125.
Stephen Curry skoraði 25 stig fyrir Golden State á meðan DeMar DeRozan fór fyrir Toronto-liðinu og skoraði 42 stig.
Þetta var ekki eini spennusigurinn því Chicago Bulls vann nauman sigur gegn Detroit Pistons, en þar vakti athygli að Zach LaVine í liði Bulls sneri aftur í sínum fyrsta leik í tæpt ár vegna alvarlegra meiðsla og skilaði 14 stigum.
Þá vann Los Angeles Lakers ekki síður spennandi viðureign gegn Dallas Mavericks þar sem lokatölur urðu 107:101 eftir framlengingu og einnig þurfti að framlengja viðureign Washington Wizards gegn Brooklyn Nets þar sem Washington vann að lokum 119:113.
Öll úrslit næturinnar má sjá hér að neðan:
Dallas Mavericks – Los Angeles Lakers 101:107
Los Angeles Clippers – Sacramento Kings 126:105
Charlotte Hornets – Oklahoma City Thunder 91:101
Washington Wizards – Brooklyn Nets 119:113
Toronto Raptors – Golden State Warriors 125:127
Chicago Bulls – Detroit Pistons 107:105
San Antonio Spurs – Denver Nuggets 112:80