„Já, því miður. Það er grátlegt að klára ekki þennan leik eins og marga aðra. Þetta er farið að verða þungt,“ sagði Ágúst Björgvinsson, þjálfari Vals, eftir 83:77-tap gegn ÍR á heimavelli í Dominos-deild karla í körfubolta í kvöld er blaðamaður mbl.is spurði hann út í hvort leikurinn í kvöld hefði verið sama saga og stór hluti tímabils; tapa jöfnum leikjum.
„Við spilum engan veginn nógu vel í fyrri hálfleik og þeir voru duglegri en við. Við getum ekki boðið upp á það gagnvart sjálfum okkur. Það var meiri barátta í okkur í seinni hálfleik, en það var komið drullumikið sjálfstraust í ÍR-liðið sem mér fannst ekki vera í byrjun leiks. Við gáfum sjálfstraust.“
Það vantaði mikilvæga leikmenn í lið ÍR, ásamt því að Breiðhyltingar töpuðu tveimur leikjum í röð fyrir leik kvöldsins. Átti þetta ekki að vera fullkominn tími til að mæta ÍR?
„Það er gömul klisja en hún er sönn, það kemur maður í manns stað. Hákon var virkilega góður og skoraði risakörfu undir lokin. Það er erfitt fyrir okkur líka, þeir þétta sér saman á meðan við höldum að leikurinn verði eitthvað auðveldari og þess vegna vorum við ekki betri en þetta í byrjun. Við urðum eitthvað pirraðir því hlutirnir voru ekki að ganga með okkur. Það var eins og við höfðum haldið að við værum liðið sem væri búið að vera í toppsætinu í allan vetur, en ekki þeir. Það fór í pirrurnar á okkur að hlutirnir gengu ekki upp nákvæmlega eins og við vildum.“
Hvað hefur verið að koma í veg fyrir að Valsmenn nái í sigra, eftir svo marga jafna leiki?
„Við erum með góða breidd en það er höfuðverkur á móti að við finnum ekki alltaf með réttu blönduna inn á. Ein blanda virkar kannski betur í sókn og önnur í vörn. Við höfum ekki alveg náð að slípa það. Auðvitað reynir maður að horfa á eitthvað jákvætt. Við erum búnir að eiga mjög marga góða leiki og við erum búnir að vera að spila lengst af á tímabilinu mjög vel, þó að sigrarnir hafi látið á sér standa. Við getum verið fúlir með þetta í kvöld en svo er leikur aftur á fimmtudaginn. Við þurfum að halda áfram að reyna að gera það sem við gerum vel og minnka það sem við gerum illa,“ sagði Ágúst Björgvinsson, þjálfari Vals, að lokum.