Tryggvi Snær Hlinason, landsliðsmaður í körfubolta, er eftirsóttur af félögum af Spáni ef marka má spænska íþróttafréttamanninn Chema de Lucas.
Leikmaðurinn stóri og stæðilegi er samningsbundinn Valencia á Spáni, en hann hefur verið í Bandaríkjunum að undanförnu að æfa og spila með liðum í NBA-deildinni. Hann æfði m.a með Phoenix Suns og tók þátt í sumardeildinni með Toronto Raptors.
Tryggvi tók þátt í nýliðavalinu í NBA í ár, en hann var ekki valinn. Félögin sem sýnt hafa Tryggva hve mestan áhuga eru Obradoiro og Andorra. Andorra endaði í sjötta sæti spænsku deildarinnar á síðustu leiktíð og Obradoiro hafnaði í tólfta sæti.
Miðherjinn lék með Valencia á síðustu leiktíð eftir að hann vakti verðskuldaða athygli með Þór á Akureyri.