Ekki liggur enn fyrir hvort Dwyane Wade muni spila körfubolta næsta vetur en nú er alla vega ljóst að hann mun ekki spila í Kína eins og fjölmiðlar höfðu fjallað um sem mögulega niðurstöðu.
Wade er með lausan samning og getur því samið við hvaða lið sem er. Wade minnkaði nokkuð óvissuna í gær þegar hann tjáði AP fréttaveitunni að hann muni annað hvort spila áfram með Miami Heat í NBA-deildinni eða leggja skóna á hillluna. Bætti hann því við að hann væri ekki í tímahraki varðandi það að semja við Miami.
Samkvæmt erlendum fjölmiðlum virðist sem Wade hafi hafnað risatilboði um að flytja til Kína og spila í deildinni þar í landi.
Wade á góðar minningar frá Kína en þar varð hann ólympíumeistari með Bandaríkjunum árið 2008 og endurtók leikinn árið 2012.
Wade er 36 ára og kom inn í NBA árið 2003. Hefur hann leikið 13 tímabil með Miami en hin með Chicago Bulls og Cleveland Cavaliers. Hann hefur þrívegis orðið NBA meistari.