Það mátti sjá á leiknum að tímabilið er rétt að byrja og að bæði Valur og Tindastóll eru að slípa saman ný lið fyrir komandi átök í vetur.
Það var sjaldan sem leikmenn virtust fara úr öðrum gír í Origo-höllinni í gær og þá var nokkuð um stirðan sóknarleik báðum megin og mikið af villum sem stöðvaði allt mögulegt flæði. Þó voru leikmenn Tindastóls ávallt skrefinu á undan, þeir héldu Völsurum ágætlega í skefjum og unnu að lokum sigur án þess að sýna sínar bestu hliðar 93:73.
Það hefur mikið breyst síðan Tindastóll varð bikarmeistari á síðustu leiktíð. Sigtryggur Arnar Björnsson, sem var einn besti leikmaður Íslandsmótsins síðasta vetur, er farinn í Grindavík en á meðan er kempan Brynjar Þór Björnsson mætt á Sauðárkrók ásamt þeim Danero Thomas og Urald King.
Sá síðastnefndi kom einmitt frá Val í sumar og lék hann sína gömlu félaga grátt í gær. King skoraði 24 stig og tók átta fráköst gegn sínum gömlu félögum, átti almennt afbragðs leik. Bandaríkjamaðurinn var skemmtilegur í spræku liði Vals á síðustu leiktíð sem var nýliði í deildinni og hann virtist ekki eiga síður heima í liði Tindastóls þó hann hafi tekið skrefið upp á við til að spila með betri leikmönnum.
Nánar er fjallað um leikinn í íþróttablaði Morgunblaðsins í dag