Grindavík er í viðræðum við þrjá erlenda leikmenn vegna karlaliðs félagsins í körfuknattleik og má búast við að einn þeirra að minnsta kosti komi til landsins eftir nokkra daga.
Terrell Vinson meiddist í leiknum i Borgarnesi á dögunum og er farinn til Bandaríkjanna. Grindavík lét einnig Michalis Liapis frá Grikklandi fara fyrir helgi.
Samkvæmt þvi sem netmiðillinn Karfan.is hefur eftir Jóhanni Þór Ólafssyni, þjálfara Grindavíkur, þá er liðið í viðræðum við þrjá leikmenn. Staðfesti hann að einn þeirra væri Lewis Clinch sem áður lék með Grindavík við góðan orðstír, síðast veturinn 2016-2017 þegar Grindavík komst í úrslit Íslandsmótsins.
Samkvæmt wikipedia-síðu sem er tileinkuð kappanum virðist Clinch vera búinn að semja við Grindavík.