James Harden er illviðráðanlegur þegar hann kemst í stuð og í nótt skoraði hann 40 stig fyrir Houston Rockets í sigri á Indiana Pacers í NBA-deildinni í körfuknattleik. Los Angeles Lakers gengur betur eftir að reynsluboltinn Tyson Chandler gekk til liðs við Lakers á dögunum.
Houston vann Indiana á heimavelli 115:103 og lagaði aðeins vinningshlutfallið sitt en Houston hefur unnið 5 leiki af fyrstu 12.
LA Lakers vann nauman 107:106 sigur á Atlanta Hawks í borg englanna. Sigurinn stóð tæpt en Chandler tókst að verja skot af stuttu færi á lokasekúndunni og tryggja þannig Lakers sigur. Chandler varði þrjú skot í leiknum en LeBron James var stigahæstur með 26 stig. Þeir félagarnir urðu saman ólympíumeistarar með bandaríska landsliðinu í London 2012.
Andre Drummond tók 22 fráköst fyrir Detroit Pistons gegn Charlotte en það dugði ekki til því Charlotte hafði betur 113:103. 22 fráköst er ekki eitthvað sem sést oft hjá einum leikmanni í NBA og vel af sér vikið þótt ekki nái það þeim tölum sem Bill Russell og Wilt Chamberlain náðu í eina tíð.
Úrslit:
Detroit - Charlotte 113:103
Houston - Indiana 115:103
New York - Orlando 115:89
Denver - Milwaukee 114:121
Portland - Boston 100:94
LA Lakers - Atlanta 107:106