Kristófer Acox, landsliðsmaður í körfubolta, verður orðinn leikmaður KR á morgun. Ingi Þór Steinþórsson, þjálfari KR, staðfesti þetta í samtali við karfan.is í dag.
Kristófer byrjaði tímabilið með Denain í frönsku B-deildinni ásamt Elvari Má Friðrikssyni, en Elvar var leystur undan samningi í kjölfar þess að Kristófer ákvað að yfirgefa félagið. Elvar hefur verið orðaður við uppeldisfélagið sitt, Njarðvík.
„Þetta hefur verið erfitt fyrir mig. Ég fékk matareitrun og er búinn að snúa mig á sama ökkla tvisvar á fjórum vikum. Svo er líka erfitt að koma á svona lítinn stað, lítið bæjarfélag þar sem lítið er um að vera og enginn talar ensku. Mér hefur samt gengið vel hvað körfuboltann varðar í þeim leikjum sem ég hef spilað,“ sagði Kristófer við mbl.is á dögunum.