Karlalið Vals í körfuknattleik hefur fundið arftaka fyrir Kendall Anthony sem yfirgaf félagið á dögunum. Í dag var tilkynnt að félagið hefði samið við bandarískan leikmann að nafni Dominique Rambo.
Anthony fór á kostum með Val í Dominos-deildinni fyrri hluta tímabilsins og skoraði yfir 30 stig að meðaltali í leik. Um helgina var tilkynnt að Valur hefði komist að samkomulagi við franska A-deildarliðið Gravelines-Dunkerque um að Anthony gangi í raðir félagsins.
Rambo er 27 ára gamall leikstjórnandi frá Dallas í Texas og spilaði síðast í Sviss. Valsmenn eru í 9. sæti Dominos-deildarinnar með 8 stig eftir 12 leiki og mætir bikarmeisturum Tindastóls í kvöld.