Derrick Rose var hetja Minnesota Timberwolves í dramatískum sigri á Phoenix Suns í NBA-deildinni í körfuknattleik í nótt. Rose skoraði sigurkörfuna á lokasekúndunni og Timberwolves vann 116:114.
Rose skoraði alls 31 stig í leiknum, þar af 29 stig í seinni hálfleik einum, og meðal annars sigurkörfuna. Hjá Phoenix var það T.J. Warren sem var stigahæstur með 21 stig.
Los Angeles Clippers vann sigur á San Antonio Spurs, 103:95, þar sem Tobias Harris skoraði 27 stig og vantaði aðeins eitt frákast og eina stoðsendingu í þrefalda tvennu fyrir Clippers. Liðið batt þar með enda á fimm leikja taphrinu sína í deildinni á meðan Spurs hefur nú tapað tveimur heimaleikjum í röð.
Þá vann Indiana Pacers sigur á Charlotte Hornets, 120:95, og heldur áfram góðu gengi sínu í austurdeildinni. Liðið er þar með þriðja besta árangurinn á tímabilinu með 31 sigur en 15 töp.
Úrslit næturinnar:
Indiana Pacers – Charlotte Hornets 120:95
Minnesota Timberwolves – Phoenix Suns 116:114
San Antonio Spurs – Los Angeles Clippers 95:103